وزیر اعظم شہباز شریف تاجکستان پہنچ گئے ، اسماعیل سامانی کی یادگار پر حاضری

ایک نیوز:: وزیراعظم محمد شہباز شریف پاکستانی وفد کے ہمراہ تاجکستان کے دو روزہ دورے پر دوشنبہ پہنچ گئے ۔
دوشنبہ ائیرپورٹ پر تاجک وزیراعظم عزت مآب قاہر رسول زادہ، تاجک وزیر توانائی و آبی وسائل دلیر جمعہ، تاجک نائب وزیر خارجہ فرخ شریف زادہ، دوشنبہ کے مئیر جمشید تبر زادہ اور پاکستان میں تاجکستان کے سفیر یوسف شریف زادہ، تاجکستان میں پاکستان کے سفیر محمد سعید سرور اور اعلی سرکاری و سفارتی اہلکاروں نے وزیرِ اعظم کا استقبال کیا ۔
دوشنبہ ائیرپورٹ پر وزیراعظم محمد شہباز شریف سے تاجک وزیراعظم عزت مآب قاہر رسول زادہ کی ملاقات اور گفتگو ہوئی۔
وزیراعظم محمد شہباز شریف کی دوشنبہ میں اسماعیل سامانی کی یادگار پر آمد ہوئی،وزیراعظم نے اسماعیل سامانی کی یادگار پر پھولوں کا گلدستہ رکھا ۔
اسماعیل سامانی وسط ایشیا کی تاریخ شخصیت اور تاجکستان کا قومی ہیرو ہے جس نے نویں اور دسویں صدی میں تاجکستان اور خراسان کے علاقے پر حکومت کی اور تاجک قوم کو تاریخ ساز ترقی کی راہ پر گامزن کیا۔