ایک نیوز:آئی سی سی چیمپئنز ٹرافی 2025 کی رونمائی کا دوسرا مرحلہ جاری ہے، ٹرافی رونمائی کے لیے ملتان پہنچ گئی۔
ٹرافی کو ملتان کے اونچے مقام دمدمے پر نمائش کے لیے رکھا گیا ،دمدمے کے بعد چیمپئز ٹرافی ملتان انٹر نشینل سٹیڈیم پہنچ گئی ، ٹرافی کی رونمائی کا دوسرا مرحلہ شیخوپورہ سے شروع ہوا، ٹرافی شیخوپورہ اور فیصل آباد کے بعد ملتان پہنچی ۔
چیمپئنز ٹرافی ملتان کے بعد بہاولپور، لاہور، پشاور، اسلام آباد اور کراچی پہنچے گی۔
آئی سی سی چیمپئنز ٹرافی 2025 سے قبل ٹرافی کا عالمی سفر پاکستان میں 16 نومبر کو شروع ہوا تھا جس کے بعد ٹرافی کو 26 نومبر سے 26 جنوری تک شریک دیگر سات ممالک میں لے جایا گیا تھا، اس دوسرے مرحلے میں شیخوپورہ کے علاوہ ٹرافی کو بہاولپور، فیصل آباد، حیدرآباد، اسلام آباد، کراچی، لاہور، ملتان، پشاور اور کوئٹہ لے جایا جائے گا۔
ٹرافی8فروری کو پاکستان اور نیوزی لینڈ کے درمیان سہ ملکی سیریز کے افتتاحی میچ کے دوران نئے اپ گریڈڈ قذافی سٹیڈیم لاہور میں بھی نظر آئے گی، ان14دنوں کے دوران جن اہم مقامات پر ٹرافی کو لے جایا جائے گا ان میں ملتان کا قلعہ، بہاولپور کا نور محل، پشاور کا ارباب نیاز سٹیڈیم، کراچی کا نیشنل بینک سٹیڈیم، حیدرآباد کا نیاز سٹیڈیم اور فیصل آباد کا اقبال سٹیڈیم شامل ہیں۔
یہ ٹرافی ٹور14فروری کو کراچی میں اختتام پذیر ہوگا، آئی سی سی چیمپئنز ٹرافی 2025 کا افتتاحی میچ میزبان پاکستان اور نیوزی لینڈ کے درمیان 19 فروری کو ہونا ہے۔