ایک نیوز: کراچی کےعلاقے فیڈرل بی ایریا میں دن دیہاڑےلڑکی سےنازیبا حرکت کا ایک اور واقعہ پیش آیاجس کی ویڈیو منظرعام پرآگئی۔
تفصیلات کے مطابق لڑکی سے نازیبا حرکت کا سارا واقعہ سی سی ٹی وی میں قید ہوگیا جس میں موٹر سائیکل سوار کو لڑکی سے نازیبا حرکت کرتے دیکھا گیا ہے۔
فیڈرل بی ایریا سے موصول ویڈیو میں راہ چلتی لڑکی کا موٹرسائیکل سوار کو پیچھا کرتے دیکھا جاسکتا ہے، ویڈیو میں دیکھا گیا کہ لڑکے نے راہ چلتی لڑکی سے نازیبا حرکت کی اور موٹرسائیکل دوڑاتا ہوا نکل گیا۔
پولیس کا کہنا ہے کہ یکم اگست کو سمن آباد میں ہونے والے واقعے سے متعلق ابھی تک متاثرہ خاتون نے قانونی کارروائی کے لئے رابطہ نہیں کیا،سی سی ٹی وی فوٹیج کی مدد سے خاتون سے بدتمیزی کرنے والے ملزم کی تلاش شروع کردی گئی ہے۔
پولیس نے دعویٰ کیا ہے کہ واقعے میں ملوث ملزم کے قریب ہیں،واردات میں ملوث ملزم کو جلد گرفتار کرلیں گے۔
خیال رہے کہ شہر میں ایک ماہ کے دوران خواتین کو ہراساں کرنے کے 3 واقعات رونما ہوچکے ہیں۔
اس سے قبل گلستان جوہر میں بھی 3 جولائی کو اسی قسم کا واقعہ پیش آ چکا ہے جس میں ملزم نے راہ چلتی لڑکی کو ہراساں کیا لیکن وہ اب تک گرفتار نہ ہوسکا۔
بعد ازاں 18 جولائی کو اورنگی ٹاؤن میں بھی ایسی ہی نازیبا حرکت کی گئی تھی جس کے اُوباش تاحال پکڑے نہ جاسکے ہیں۔