ایک نیوز: وزیراعظم محمد شہبا زشریف نے وفاقی کابینہ کے ارکان کی گزشتہ ایک سالہ کارکردگی کا جائزہ لینے کافیصلہ کیا ہے۔
حکومتی ذرائع کے مطابق وزیراعظم وفاقی حکومت کی ایک سالہ کارکردگی ،وزارتوں، محکموں کی کارکردگی رپورٹ خود جانچیں گے، وزیراعظم کی جانب سے ہدایت نامہ تمام وزارتوں کو جاری کر دیا گیا ہے ۔
ذرائع کا کہنا ہے کہ وزیراعظم نے گزشتہ ایک سال میں ہونے والی اصلاحات پر عملدرآمد رپورٹ طلب کرتے ہوئے ایک سال کے دوران دی گئی نوکریوں کی تفصیلات بھی مانگ لیں ہیں۔
حکومتی ذرائع نے کہا ہے کہ وزارتوں اور اداروں کی طرف سے 12 ماہ میں اصلاحات کی تفصیلات فراہم کی جائیں، پالیسی میں تبدیلی، ڈھانچہ جاتی ایڈجسٹمنٹ، گورننس میں اضافہ پر بریف کریں،سرکاری اداروں میں اصلاحات لانے میں کتنی کامیابی ملی،وزارتوں کو جواب دینا پڑے گا۔
ذرائع کا مزید کہنا ہے کہ وفاقی حکومت اس سال ایک لاکھ 50 ہزار خالی سیٹوں کو ختم کر دے گی، سرکاری محکموں میں ڈیلی ویجز کی سیٹیں بھی ختم کر دی جائیں گی۔