ایک نیوز: فیڈرل بورڈ آف ریونیو نے فیس لیس کسٹمز اسسمنٹ سسٹم میں ہیر پھیر کرنے کی کوشش ناکام بنا دی ۔
ذرائع کے مطابق ایف بی آرحکام نے متوقع ہیر پھیر پر کراچی کسٹمز کی ٹیم کو مسلسل کڑی نگرانی کرنے کی ہدایت دی تھی، فیس لیس کسٹمز اسسمنٹ سسٹم میں ہیر پھیر کرنے میں ملوث پائے گئے افراد کیخلاف سخت کارروائی شروع کر دی گئی ہے، ہیر پیر میں ملوث درجنوں ایجنٹس کے لائسنس معطل، 3افراد گرفتار اور ایک اپریزنگ افسر کیخلاف تحقیقات کا آغاز کردیاگیا ۔
ایف بی آر حکام کا کہنا ہے کراچی کسٹمز نے اس غیر قانونی سرگرمی میں شامل 45 ایجنٹس کے کسٹمز لائسنس معطل کر د یئے ہیں، جن ایجنٹس کے لائسنس معطل کئے گئے انہیں شوکاز نوٹس بھی جاری کر دیئے گئے ہیں ،ہیر پھیر میں ملوث ایک اپریزنگ افسر کو معطل کرکے اسکے خلاف باضابطہ تحقیقات بھی شروع کر دی گئی ہیں ۔
حکام کا کہناہے کہ اس غیر قانونی سرگرمی میں ملوث ایجنٹس، اپریزنگ افسر اور دیگر پرائیویٹ افراد کیخلاف فوجداری مقدمہ بھی درج کر لیا گیا ہے ، معاملے کی چھان بین کے لئے ایک تحقیقاتی ٹیم بھی تشکیل د ے دی گئی ہے، اب تک تین افراد کو گرفتار کیا جا چکا ہے ،دیگر ملزمان کی گرفتاری کے لیے چھاپے مارے جا رہے ہیں ۔
ایف بی آر حکام کے مطابق فیس لیس کسٹمز اسسمنٹ سسٹم کسٹمز کلیئرنس کا کام موثر طریقے سے انجام دے رہا ہے، اس سسٹم کو کسٹمز کلیئرنس کے میدان میں اسٹیک ہولڈرز کی طرف سے ایک انقلابی قدم قرار دیاجا رہا ہے ۔
خیال رہے کہ وزیراعظم محمد شہباز شریف نے تقریباً دو ہفتے پہلے فیس لیس کسٹمز اسسمنٹ سسٹم کا افتتاح کیا تھا۔